 |
 |
 |
 |
 |
 |
Kooistra wint tredde WK-partij en nimt belangrike foarsprong
Warkum – Taeke Kooistra hat de tredde partij fan de wrâldtitelmatch Frysk damjen tsjin Marten Walinga wûn.
Yn in strategysk heechsteande partij luts Kooistra oan it langste ein troch yn de partij hieltyd mear kontrôle te krijen oer de linkerflank fan it boerd. Dy posisjonele druk betelle him út yn it einspul. Yn in seis-tsjin-seis-posysje kaam ien fan Walinga’s skiven wurkleas tsjin de bordrand telâne, wêrtroch’t syn mooglikheden hieltyd fierder beheind waarden.
Der bleau noch mar ien skerpe fuortsetting út in kombinaasje wei dy’t mooglik útsjoch joech op in kampeftich einspul. Nei lang rekkenjen keas Walinga lykwols foar in oare fuortsetting, wêrnei’t Kooistra it komplekse einspul flaterleas nei winst fierde.
Mei syn krekte einspultechnyk ûnderstreke Kooistra opnij syn grutte klasse. Op in wichtich momint yn de wrâldtitelmatch liket er syn topfoarm fûn te hawwen en set er in wichtige stap rjochting it heljen fan de wrâldtitel.
Ek neist it spylboerd wie der in soad aktiviteit. Tagelyk mei de WK-match organisearre Stifting WFD online toernoaien op Lidraughts. Damleafhawwers út binnen – en bûtenlân koene sa sels yn aksje komme, wylst sy de ûntwikkelingen yn de wrâldtitelstriid op de foet folgen.
Dêrmei krige de ynternasjonale promoasje fan it Frysk damjen op ‘e nij in ekstra ympuls.
De fjirde partij fan de WK-match wurdt sneontemiddei spile yn Warkum. Dan krijt Walinga de kâns de stân wat mear yn lykwicht te bringen, wylst Kooistra syn foarsprong fierder útwreidzje kin.
Over de auteur