Walinga mist winst yn spektakulêre fjirde WK-partij, Kooistra behâldt romme foarsprong

Walinga mist winst yn spektakulêre fjirde WK-partij, Kooistra behâldt romme foarsprong

WARKUM – De fjirde partij fan de WK Match Frysk damjen tusken regearjend wrâldkampioen Marten Walinga en útdager Taeke Kooistra hat it publyk sneon in wier damgefjocht foarset. Nei goed fjouwer oeren spyljen like Walinga op wei nei de oerwinning, mar yn in tige yngewikkeld dammeneinspul wist Kooistra him dochs noch nei in remize te fjochtsjen. Dêrtroch komt de tuskenstân yn de wrâldtitelstriid 3 -1, yn it foardiel fan de útdager.

Yn it histoaryske stedhûs fan Warkum keas Walinga al yn de iepeningsfaze foar in net folle spile fuortsetting, wêrmei’t er syn tsjinstanner fuortendaliks foar komplekse karren stelde. Kooistra moast fan de earste setten ôf djip rekkenje om alle farianten te trochgrûnjen en keas úteinlik foar in feilige foarpost, dy’t in pear setten letter wer ôfruile waard.

Dêrnei ûntjoech him in strategysk flankspul dêr’t Kooistra in sintrumskiif yn krige en fuort wer offere om aktyf spul te krijen. Lykas sa faak yn it Frysk damjen eage de stelling foar de taskôgers lange tiid hast folslein yn lykwicht, wylst beide grutmasters al beseften dat wyt – Walinga – in lyts posisjoneel foardiel opboud hie. Ek de kommentatoaren fan de livestream, Fedde Kramer en Frederik Bos, seagen mei stipe fan de analyzekompjûter Scan dat it inisjatyf stadichoan yn hannen fan Walinga kaam. Dochs bleau de stelling útsûnderlik kompleks en fregen de mooglike fuortsettingen allegeduerigen om krekte berekkeningen.

Geandewei sloech de kompjûteranalyze hieltyd fierder út yn it foardiel fan de wrâldkampioen. Kooistra keas lykwols hieltyd foar de skerpste ferdigenjende farianten en bleau syn tsjinstanner foar lestige praktyske problemen stellen. Doe’t beide spilers úteinlik in daam helje koene en Walinga boppedat twa skiven mear hie, like de oerwinning binnen hânberik. It slot fan de partij bewiisde lykwols opnij hoe ferriederlik Frysk damjen wêze kin. Yn it komplisearre einspul miste Walinga in beslissende winstgong, wêrnei’t Kooistra mei sekuer ferdigenjend spul dochs noch in fertsjinne kamp ôftwinge koe. Nei goed fjouwer oeren spyljen waarden de punten dield.

Mei noch sân partijen te gean liedt Taeke Kooistra de WK Match mei 3 -1. De spanning yn de striid om de wrâldtitel bliuwt dêrmei ûnfermindere grut. Ek de deistige online toernoaien, dy’t parallel oan de WK Match organisearre wurde, lutsen opnij dielnimmers út ferskate lannen. De dei-oerwinningen gie nei de Poal Łukasz Kosobudzki en de Tsjechyske Petra Dušková, wêrmei’t it ynternasjonale karakter fan it evenemint op ‘e nij ûnderstreke waard. 

De wrâldtitelmatch wurdt noch oant en mei 2 augustus spile yn it histoaryske stedhûs fan Warkum. Dêrnei ferhuzet de striid nei it monumintale stedhûs fan Harns, dêr’t de lêste seis partijen útmeitsje sille wa’t him wrâldkampioen Frysk damjen 2026 neame mei. 

De partijen binne oer de hiele wrâld live te folgjen fia frisiandraughts.com, ynklusyf saakkundich livekommentaar en analyze.