 |
 |
 |
 |
 |
 |
Der wienen yn elts gefal wer wat mear dammers as ferline wike.
Troch Cor Kooistra
SKEARNEGOUTUM. Troch it Fryslân Iepen fan ferline wike sieten op de klupjûn fan de Strikers mar ien hanfol dammers. Op sokke mominten geane der wol ris stimmen op om de stekker der mar út te lûken en dat de leden mar omsjen moatte nei in oare klup. Yn syn algemienheid is it sa as men dat dwaan soe, kostet dat dammers Frysk spul. Ofrûne moandeitejûn sieten wer njoggen spilers achter de buorden. As elk oanwêzich west hie soenen der tolve dammers sitte. Mar it wienen njoggen en dat wie hast it dûbele fan in wike lyn. In moai gegeven.
It meast opfallende begjin fan de partijen kaam út de hoeke wêr’t Tineke Teigeler tsjin Bauke Dykstra harren spul spilen. Al glunderjend liet Tineke sûnder omhaal fan wurden witte dat se foar stûn. Foarstean is op himsels neat, mar it giet om it ôfmeitsjen. Dykstra wie fansels fuortendaliks goed wekker. Hy hie der net sa folle tiid foar nedich om mei likense munt werom te beteljen. En dat net allinne. Hy kaam ek noch foar te stean en doe wie foar him de aap binnen.
Bauke Bos damme tsjin Hennie de Haan en Jan Castelein. De earste partij hie er frij fluch yn de knip, mar tsjin Jan Castelein koste him dat wat mear muoite. Lykwols kaam dat ek foar de hearen en koe Bos wer twa punten by skriuwe. Willem Schaap en Sjoerd Jan Bakker hienen in moaie lykopgeande partij. Mar doe’t Bakker foar Sinteklaas begûn te spyljen, naam Willen it kadootsje mei beide hannen oan.
De partij tusken Cor Kooistra en Dicky van der Meer seach der foar de omsitters mar wyld út. Elk tocht dat der wol ris in stevige wintertwirre trochhinne waaie koe. Dy twirre liet wol in skofte op him wachtsje . Der waarden wat gatsjes tichtstrutsen, mar lykwols bleau it in wiffe boel foar beide spilers. En doe striek Dicky in houtsje dat net koe. Dat hie fan gefolgen dat de twirre troch it hout gie. Earst liet Cor trije houtsjes slaan. Doe noch ien en wol sadanich dat de partij út wie.
Utslaggen: Willem Schaap – Sjoerd Jan Bakker 1 – 0; Bauke Bos – Jan Castelein 1 – 0; Tineke Teigeler – Bauke Dykstra 0 – 1; Cor Kooistra – Dicky van der Meer 1- 0; Bauke Bos – Hennie de Haan 1 – 0.
Wrâldkampioenskip FRYSK! Foeke Tiemensma pakt de titel, Italianen tichteby.
Troch Stifting WFD
Oant de lêste partij wie it ûnwis oft de hjoeddeistige wrâldkampioen FRYSK! Jelle Wiersma syn titel mei sukses prolongearje koe. Al betiid yn it toernoai moast er yn it stof bite tsjin Tiemensma mar dy foarsprong belytse yn it toernoai ta in heale punt. De lêste partij wie foar beide spilers beskiedend. Dêryn troffen se beiden sterke Italjaanske tsjinstamnders. Wiersma fersloech de sterk spyljende Italjaan Paolo Faleo, mar ek Tiemensma pakte de winst troch de Italjaansk kampioen Davide Gemma fan it boerd te spyljen en pakte dêrmei syn twadde wrâldtitel FRYSK! Oer it algemien spylje alle Friezen mei yn de top mar dit jier foel it op dat de grutmaster Taeke Kooistra en de masters Folkert Groenveld en Hein de Vries in soad spilers út it bûtenlân foar har gean litte moasten. It is dúdlik dat it FRYSK! net allinnich oan populariteit wint mar ek dat it nivo fan de bûtenlânske spilers gaueftich foarút giet. It is noch in kwestje fan tiid dat de nije wrâldkampioenen út it bûtenlân komme sille, benammen no’t de organisaasje, stichting WFD (Wrâldkampioenskip Frysk Damjen), hieltyd mear bûtenlânske partners krijt.
(foto Stifting WFD)
(foto Stifting WFD)
De resultaten en partijen fan it achtste Wrâldkampioenskip FRYSK! fine jo op:
https://lidraughts.org/broadcast/world-championship-frysk-round-7/NJ6Xyw
Webside toernoai: https://www.com/2pagina/136/12/13/fo-2025.html
Organisaasje: Stifting WFD, www.frisiandraughts.com
Fryslân Open 2025 | Jelle net te bedamjen
Troch Stifting WFD
Jelle Wiersma (GM) net te bedamjen. Hear en Grutmaster op it boerd mei de 100 fjilden is de grutmaster Jelle Wiersma fan Wommels. Oan ’e rige fan acht winnnde partijen yn it Fryslân Open heakke hy noch ris trije kear winst ta yn it grutmastertoernoai. Syn styl fan spyljen is net te benaud en oantreklik, en dat makket dat syn tsjinstanners alle wedstriden wer swier ûnder druk set wurde. It Fryslân Open 2025 hat dêrmei dan ek in terjochte winner. Foeke Tiemensma fan Frjentsjer koe allinnich mar respektfol bûge mar troch syn twa oare oerwinningen op Liuwe Westra en Hein de Vries waard dochs in twadde plak behelle dat bêst genôch wie. Liuwe Westra dy’t foar it earst yn syn karriêre yn de grutmasterklasse útkaam, liet sjen dat er it yngewikkelde iepeningsspul goed behearske, mar skeat faak krekt te koart yn it dreech te berekkenjen einspul. Hein de Vries fan Ljouwert behelle ien oerwinning tsjin de nijkommer Westra.
Ek yn de mastergroep waarden komplekse partijen net út de wei gien en ferskynden der geregeld yngewikkelde slachwurken op it boerd dy’t dan faak de partij beskaten. Taeke Kooistra wie hjir dúdlik de sterkste. De Poal Łukasz Kosobudzki spile ek tige sterk en syn styl fan spyljen is kampioensweardich. De Jutriper Folkert Groenveld liet hjir de finalist Willem Dijkstra krekt achter him omdat Dijkstra de konsekwinsjes fan in yn gong setten kombinaasje net goed oerseach.
Tagelyk mei dizze finales waarden de lêste kwalifikaasjepartijen yn de eardere Botniastins, it hjoeddeiske Theater De Koornbeurs, ôfwurke foar de lêste plakken foar it wrâldkampioenskip FRYSK! Pas nei hast 7 oeren spyljen waard dúdlik wa’t moarn meidwaan meie oan it achtste WK FRYSK! Dizze jongste fariant fan it damspul wurdt benammen yn it bûtenlân mei iepen earms ûntfongen. FRYSK! wurdt mear as strategysk boerdspul sjoen, is fluch te learen, eaget ienfâldich mar herberget in kompleksiteit lykas fan it skaakspul. Der diene dit kear 12 Italiaanske spilers oan mei.
De risseltaten fan it Grutmastertoernoai fine jo op:
https://toernooibase.kndb.nl/opvraag/standenke.php?Id=47823&jr=25&taal=
Webside toernoai: https://www.com/2pagina/136/12/13/fo-2025.html\
Organisaasje: Stifting WFD, www.frisiandraughts.com
Fryslân Open 2025 – Wild West yn Frjentsjer
Troch Stifting WFD
FRJENTSJER. Nei trije dagen moardzjen, in soad taktyske partijen en bizarre kombinaasjes moasten noch seis barraazje partijen spile wurde om de úteinlike finalisten fêst te stellen. De Poal Kosobudzki en dûmny Westra ferrasten noch it meast yn dit toernoai troch har te kwalifisearjen foar it Master en Grutmastertoernoai dat freedtejûn yn it Keninklik Eise Eisinga Planetarium úteinset.
It Fryslân Open hat dit jier 24 dielnimmers. Der binne lykwols, nettsjinsteande it tal dielnimmers, alle jierren mar 8 finaleplakken beskikber: de nûmers 1 -4 spylje it saneamde Grutmastertoernoai, de nûmers 5 -8 it Mastertoernoai. Op tongersdei 20 febrewaris waarden omloop 7 en 8 spile, en nei ôfrin wiene der mar leafst sân kandidaten foar it Mastertoernoai. Foardat it safier wie, koe it publyk genietsje. Foeke Tiemensma, Taeke Kooistra, Hein de Vries en Tsjerk Wijbenga, Lukasz Kosobudzki en Fedde Wiersma wisten harren efterstân ta de kopgroep aardich te ferlytsjen mei in oerwinning. Benammen Kosobudzki syn prestaasje waard oer beard fanwegen it útfieren fan in klassike iepeningsslachset, de saneamde Tytsma-set. Omdat dy set sa bekend is, komt er hast noait op it boerd. Mar Kosobudzki hie syn húswurk goed dien, en in momint fan ûnbetochtsumens waard de oars wakker betûfte Cor Kooistra fataal!
Hein de Vries kaam sa ûnbedrige op it twadde plak (nei Frysk kampioen Jelle Wiersma, dy’t in 100% skoarde), mar de nûmers 3 oant en mei 14 hiene hast allegear noch kâns op in finaleplak – fan wa’t de helte teloarsteld wurde moatte soe. Yn de lêste omloop wisten Foeke Tiemensma en Liuwe Westra beide fan 4½ op 5½ te kommen troch oerwinningen op resp. Willem Dijkstra en Henk Haanstra. Dat soe bliken dwaan genôch te wêzen foar in plak yn it Grutmastertoernoai. Taeke Kooistra spile kamp tsjin Hein de Vries, en helle sa mei 5 punten in plak yn it Mastertoernoai. Kosobudzki kaam like heech as him troch in oerwinning op Dicky van der Meer. Nei in ritige partij hie dy lêste in moaie kombinaasje útfiere kinnen, mar hy fûn dy net en bedarre by einbeslút yn in ferlerne stelling. Foar de oare beide finaleplakken wiene der oan de ein fan de rit fiif kandidaten: Fedde Wiersma, Tsjerk Wijbenga, Willem Dijkstra, Henk Haanstra en Folkert Groenveld. Underyn it klassemint waard lykwols ek ta de lêste snik striden. Spektakulêr wie it om te sjen hoe’t de Kameroenees Jean Marc Ndjofang ûnder drege tiidsdruk de oerwinning tsjin Patrick Casaril ynhelle.
Foar de barraazjes luts Fedde Wiersma him werom. Der folgen dus trije omlopen, mei hieltyd 20 minuten + 10 sekonden de spiler. Yn de earste omgong fersinde Groenveld him fuort al raar yn de iepening, mar Tsjerk Wijbenga joech it foardiel oant twa kear ta wei, en ferlear úteinlik de partij yn in waansinnich einspul. De partij fan Willem Dijkstra tsjin Henk Haanstra ferrûn krekt wat evenrediger, mar yn it einspul seach er in lyts setsje oer de holle. Yn de twadde omloop spile Haanstra syn tsjinstanner Wijbenga stadich mar wis fan it boerd, wylst Groenveld tsjin Dijkstra in goede posysje opboude, dêrnei alles weijoech, en úteinlik dochs noch kamp yn de wacht sleepte. Sa kamen beide koprinners op 1 punt. Yn de tredde omloop kaam it ta in útdragene saak. Groenveld boude in winnende partij op tsjin Haanstra, mar seach op it lêste momint in mearslach oer de holle, dat hy kaam net fierder as kamp. Op it oare boerd einige in komplekse partij yn in dito einspul. Wijbenga koe oant trije kear ta de winst net fine, en ferlear úteinlik ek noch. Sa waarden Willem Dijkstra en Groenveld pleatst mei 2 punten, wylst Henk Haanstra (1 punt) en Tsjerk Wijbenga (0) der krekt njonken griepen.
Einstân nei acht rûntsjes en de barraazjes: (8 p.) Jelle Wiersma 1.2 (6), Hein de Vries3-4 (5.5) Liuwe Westra, Foeke Tiemensma5-6. (5 p.) Taeke Kooistra, Łukasz Kosobudzki,(4.5 + 2.5) Willem Dijkstra(4.5 p. + 2) Folkert Groenveld, (4,5 p. + 1,5) Henk Haanstra(4,5 p. + 0) Tsjerk Wijbenga(4.5 p.) Fedde Wiersma12-14. (4 p.) Aleksej Domčev, Petra Dušková, Cor Kooistra15-19 (3.5 p.) Dicky van der Meer, Fedde Kramer , Auke Zijlstra, Ties Slagter, Hidde de Vries20-21 (3 p.) Renaud Braye, Jean Marc Ndjofang(2p.), Patrick Casaril(1 p.) Herbert Tulleken24. (0 p.) Alix Bouffard
De barraazje tusken Willem Dykstra en Folkert Groenveld, dy’t har beide pleatse soene, mei op ’e eftergrûn karmaster Siebren Dyk. (foto Stifting WFD)
Aktuele stân fan it Fryslân Iepen 2025 fine jo op: https://toernooibase.kndb.nl/opvraag/standen.php?taal=&kl=23&Id=47797&jr=25&afko=23&r=
Webside toernoai: https://www.frisiandraughts.com/2pagina/136/12/13/fo-2025.html \
Organisaasje: Stifting WFD, www.frisiandraughts.com
Fryslân Open 2025 | Dei 2
Troch Stifting WFD
FRENTSJER– Fantastyske kombinaasjes op it boerd en miste kânsen. Hjoed waard der oer de hiele liny aventoerlik spile, dat resultearre yn taktyske partijen mei in soad kombinaasjes, al of net mist. Sels de Kameroenees hie twa kear ferneatigjend taslaan kinnen.
Yn de fjirde omloop spile de Poal Kosobudzki in sterke taktyske partij tsjin Tsjerk Wijbenga en bruts troch nei daam, dy waard lykwols te begearich helle en dat bruts him fuortendaliks op. De twa folgjende partijen wist hy wol yn winst om te setten. Ek de Belch Braye hie op syn minst kamp helje moatten tsjin de master Hein de Vries, mar hy skeat yn it einspul te koart. Petra Dusková liet ek yn it einspul de remize lizze tsjin Dicky van der Meer en ferlear. Itselde oerkaam Fedde Wiersma tsjin Willem Dijkstra, in winnende stelling sloech om nei ferlies.
Yn de sechsde omloop konsolidearre Jelle Wiersma syn kopposysje troch kollega-grutmaster Taeke Kooistra oer it mad te kommen mei in ferrifeljende kombinaasje. De measte partijen waarden yn it einspul útmakke, drege einspullen wêrby’t de maksimale trije damsetten en de tiidsdruk troch de klok in krúsjale rol spilen. As ferrassende winner kaam Liuwe Westra út de bus tsjin de master Folkert Groenveld, dy’t ûnder tiidsdruk beswiek.
Tuskenstân nei seis omlopen:
- (6 s.) Jelle Wiersma
- 2 -3 (4,5) Liuwe Westra, Hein de Vries
- 4 -5. (4 p.) Willem Dijkstra, Henk Haanstra
- 6 -12 (3,5 p.) Dicky van der Meer, Taeke Kooistra, Folkert Groenveld, Auke Zijlstra, Ties Slagter, Tsjerk Wijbenga, Foeke Tiemensma
- 13 -15 (3 p.) Aleksej Domchev, Lukasz Kosobudzki, Cor Kooistra
- 19 -21. (2 p.) Renaud Braye, Patrick Casaril, Hidde de Vries
- 22 -23. (1 p.) Jean Marc Ndjofang, Herbert Tulleken,
- 24. (0 p.) Alix Bouffard
(Foto: Stifting WFD)
(Foto: Stifting WFD)
Aktuele stân fan it Fryslân Iepen 2025 fine jo op:https://toernooibase.kndb.nl/opvraag/standen.php?taal=&kl=23&Id=47797&jr=25&afko=23&r=–
Webside toernoai: https://www.frisiandraughts.com/2pagina/136/12/13/fo-2025.html \ -Organisaasje: Stifting WFD, www.frisiandraughts.com
In lyts protsje dammers en dan ek noch gebak
Troch Bauke Bos
Der wiene dizze jûn mar in lyts protsje dammers, mar fiif. Mar dit makke it net minder gesellich. Foaral doe’t der in man fan it korps, dy’t yn in oare seal op moandeis harren spyljûn hat, binnen kaam mei gebak. Se hiene skynber wat te fieren en tochten dêrby ek oan ús. Dit waard fansels tige wurdearre. Mar it earste spul wie doe al út, it spul tusken Tineke Teigeler en Sjoerd Jan Bakker. De stikjeskriuwer hearde op in stuit dat Tineke nei in hout efterstân wer lyk kaam en seach efkes by it spul en doe helle Tineke der in slachje út wêrby Bakker in daam helle en Tineke twa houtsjes oer hie. It kaam krekt, mar foar Sjoerd Jan kaam it krekt goed út en hy wûn de partij.
Willem Schaap doarde it oan om wer ris tsjin twa tagelyk te spyljen, Wyt tsjin Jan Castelein en swart tsjin Bauke Bos. De mannen waarden goed oan it tinken set, mar Willem moast sels ek goed oplette. Foaral by it spul tsjin de skriuwer fan de klub. Jan Castelein kaam al ga uien achter mar hy hood noch lang partij. Bauke Bos hie in set krekt net goed troch rekkene en rekke in houtsje achter. Dochs waard it noch in moaie partij, wêrby beide mannen der goed om tinke moasten. Willem wûn beide partijen, en wylst syn earste partij al út wie, liet er Jan noch wat moaie stantsjes sjen en it is moai dat dizze man sa’n aardichheid hat oan it Fryske damspul, wat foar in pear jier lyn noch folslein ûnbekend wie.
Utslaggen: Tineke Teigeler–Sjoerd Jan Bakker 0-1; Willem Schaap- Jan Castelein 1- 0; Bauke Bos- Willem Schaap 0-1
Fryslân Open 2025 | Dei 1
Troch Stifting WFD
FRANEKER – Spectaculair machtsvertoon en addertjes onder het gras. De Litouwer Aleksej Domčev verslikte zich in de openingsronde in een klassieke openingscombinatie tegen de Jorwerter debutant Willem Dijkstra. Niet veel later dacht de ervaren Folkert Groenveld naar een winnend eindspel te combineren en zijn tegenstander Herbert Tulleken uit Amsterdam was hiervan zo onder de indruk dat hij meteen opgaf. Wat hij miste was dat er nog een addertje onder het gras zat, waardoor hij op gelijke hoogte zou kunnen komen. Toch waren het niet alleen de ervaren Friese dammers die hun kunnen lieten zien.
In de tweede ronde liet de Pool Łukasz Kosobudzki de Franeker favoriet Foeke Tiemensma in het stof bijten. In dezelfde ronde wist de Belg Renaud Braye te winnen van Willem Dijkstra. Ook in die ronde verraste Henk Haanstra zijn tegenstander Auke Zijlstra met een zeer fraaie combinatie in een complexe stelling. In de derde ronde herhaalde Haanstra dit kunststukje tegen Fedde Wiersma. Ook Braye bleek op stoom te zijn en wist te winnen tegen Willem Dijkstra.
Zo staan na drie ronden weliswaar twee Friese topdammers bovenaan in de personen van Jelle Wiersma (regerend Fries kampioen) en Henk Haanstra met ieder 3 punten, maar de Tsjechische Petra Dušková en de Belg Renaud Braye zitten hen met 2 punten op de hielen in een peloton van zeven spelers. Opvallend is dat de Friese cracks Taeke Kooistra en Foeke Tiemensma nog niet verder komen dan 1 punt.
Tussenstand na drie ronden:
1. (3 p.) Henk Haanstra, Jelle Wiersma
3-4. 2.5 p.) Dicky van der Meer, Liuwe Westra
5-11 (2 p.) Petra Dušková, Fedde Wiersma, Folkert Groenveld, Auke Zijlstra, Ties Slagter, Renaud Braye, Hein de Vries
12-13 (1.5 p.) Taeke Kooistra, Tsjerk Wijbenga
14-21 (1 p.) Cor Kooistra, Łukasz Kosobudzki, Fedde Kramer, Aleksej Domčhev, Patrick Casaril, Foeke Tiemensma, Jean Marc Ndjofang, Willem Dijkstra
22. (0 p.) Alix Bouffard, Herbert Tulleken, Hidde de Vries.
- De resultaten van de eerste drie rondes van het Fryslân Open 2025 vindt u op: https://toernooibase.kndb.nl/opvraag/standen.php?taal=&kl=23&Id=47797&jr=25&afko=23&r=
- Website toernooi: https://www.frisiandraughts.com/2pagina/136/12/13/fo-2025.html\
- Organisatie: Stifting WFD, www.frisiandraughts.com
(Foto Stifting WFD)
(Foto Stifting WFD)
Lotting foar it Fryslân Iepen 2025 bekend, earste earertitels yn it Frysk damjen útrikt.
FRJENTSJER – Froulike dielnimmers lotsje swier. Op tiisdei 18 febrewaris start de earste ronde fan it Fryslân Iepen 2025 op de klipper Elizabeth. De finalisten fan it WK 2024, Taeke Kooistra (GM) en Ties Slagter treffe elkoar fuort al yn de earste ronde en krije in swiere earste partij, lykas Fedde Kramer út Midwolda dy’t ien fan de favoriten treft, de Frjentsjerter Foeke Tiemensma (M).Der binne twa froulike dielnimmers, Petra Duskova út Tsjechië en Alix Bouffard út Kanada, beiden krije in swiere earste ronde tsjin respektyflik Jelle Wiersma (GM), ien fan de favoriten. Alix Bouffard mei it opnimme tsjin Henk Haanstra, winner fan it Fryslân Iepen 2023.Foarôfgeand oan de earste pairing waard foar it earst yn de histoarje fan it Frysk damjen de titels Master en Grutmaster útrikt. Dy hanneling waard dien troch de spilersfertsjintwurdiger fan de FMJD, Jean Marc Ndjofang.
Aktuele stân fan it Fryslân Iepen 2025 fine jo op:https://toernooibase.kndb.nl/opvraag/standen.php?taal=&kl=23&Id=47797&jr=25&afko=23&r=– Webside toernoai: https://www.frisiandraughts.com/2pagina/136/12/13/fo-2025.html \ -Organisaasje: Stifting WFD, www.frisiandraughts.com
Stadige Striker Jelle Wiersma op ‘e nij Frysk kampioen.
Troch Cor Kooistra
Nei alle wedstriden yn it ramt fan de persoanlike kampioenskippen koenen de Strikers mei-inoar de resultaten dêrfan wer ris even oereidzje. Mei nocht mochten se stelle dat de Strikers it noch net sa min dien hienen. Jelle kampioen en Willem Schaap koe him hanthavenje yn de kampioensklasse. En fierders waard yn de oare achten ek noch wol aardich goed presteard.
Ek waard der fansels wer damme. Ype Boelens wie wer op dreef. Hy liket sa njonkenlytsen wol wat in angstgegner te wurden foar de foarsitter Cor Kooistra. It wie sûnder mis in moaie en wylde partij. Mar úteinlik koe Kooistra dat net hâlde en ferlear. Bauke Bos moast it ek al belije. Hy koe it net hâlde tsjin Tineke Teigeler. Kom ik ek wer ris thús mei de winst sei se.
Jelle Wiersma sels moast tsjin Sjoerd Jan Bakker. Dat like sa op it earste each in frij gelykweardige partij. Mar de nije Frysk kampioen liet wol even sjen dat er net foar neat kampioen wurden is. Doe’t de omstanners mooglik noch tochten dat der in kampke yn siet, bliek dat Jelle dêr hiel oars oer tocht en de partij winnend útmakke.
Willem Schaap damme tsjin de beide Casteleinen. Dat nivoferskil is te grut en dat die ek wol bliken út de útslaggen. Dochs ha de mannen noch drok en mei nocht dwaande west mei moaie stantsjes en slachjes.
Dicky van der Meer siet yn Aldegea om te damjen om de Fryslân Kup. Hy moast dêr damje tsjin Willem Hoekstra, de man yn topfoarm. Dochs die letter op de jûn bliken dat Dicky it prima dien hie en Willem ferslein hie. Hy sit no yn de finale!
Utslaggen: Ype Boelens – Cor Kooistra 1 – 0; Jelle Wiersma – Sjoerd Jan Bakker 1 – 0; Bauke Bos – Tineke Teigeler 0 – 1; Kees Castelein – Willem Schaap 0 – 1; Willem Schaap – Jan Castelein 1 – 0. Fryslân Kup: Dicky wint fan Willem Hoekstra.
Jelle Wiersma wer kampioen Frysk damjen
Troch Siebren Dyk
Blauhús — Der wurde prachtige partijen spile, en oan ‘e ein ta hast altyd spannend. En dochs driget it persoanlik kampioenskip yn it damjen Frysk spul ek in lyts bytsje ferfelend te wurden. Jelle Wiersma wûn dus wer. Sneon helle er yn Blauhús al wer syn alfte kampioenskip, sûnt 2017 hat sels gjin oarenien it tradysjonele gouden tientsje yn ûntfangst naam. De man kin der langer hast in filla fan keapje.
Foardat de lêste twa omlopen begûnen, wiene der noch twa konkurrinten dy’t Wiersma byhâlde koene. Marten Walinga hie op dat stuit sels likefolle punten. Mar Walinga hie de moarns in lestige tsjinstanner yn Taeke Kooistra. De njoggentjinfâldich kampioen – yn earder tiden wie it kampioenskip ek wol ris wat iensidich – is miskien wol wat op syn retoer, mar de âlde foks hat syn streken perfoarst noch net ferlern. Op syn tritichste set, mei elkmis noch tsien houtsjes, sette er Walinga ûnder druk. Dy loste de driging efterôf ferkeard op, mar wa sjocht ek sa’n djippe falstrik? Kooistra sette in fjouwerdûbelde kombinaasje yn, hy offere acht houtsjes, liet Walinga ek even op daam komme, mar sels hold er der acht setten letter wol in daam oan oer, en dy kaam sa geunstich te stean dat de fjouwer skiven fan Walinga gjin kant mear út koene. In keunststikje!
De oare konkurrint, Pieter Hoogterp, koe ûnderwilens tsjin de leechpleatste Willem Schaap gjin potten brekke. Hy hie tefolle hout yn ‘e midden, en waard troch de Jirnsumer sa yn ‘e tange knypt dat er it optlêst mar leafst fjouwer houtsjes minder hie, en doe waard it yndied tiid om de hân út te stekken. En Wiersma? Dy gong yn syn striid tsjin Hein de Vries lykop, mar sette syn hout wol sa strategysk del dat er yn in stân fan trije om trije de winst opstrike koe.
Yn ‘e lêste omloop wie der noch ien dy’t Wiersma mooglikerwize dwerse kneppels smite koe. Dat wie Marten Walinga: as dy yn it direkte duel winne soe, soed er noch op likense hichte komme kinne. Mar safier kaam it net. Walinga krige gjin fet op syn tsjinstanner, pleatste op in stuit wol in offer, dat lykwols net folle útwurking hie, en hy waard dêrnei troch Wiersma sa besingele dat dy earder op daam komme koe. Hoogterp syn mooglik twadde plak rekke ûnderwilens ek út sicht doe’t hy tsjin Henk Haanstra syn materiaal wat al te folle op ien kant fan it boerd sette. Haanstra hie de moarns al fan Folkert Groenveld wûn, en ek Kooistra helle op kundige wize syn twadde oerwinning fan ‘e dei binnen, no ten koste fan Hein de Vries.
It kaam der meiinoar op del dat Kooistra en Haanstra úteinliks it twadde plak besetten, mar wol op de grutte ôfstân fan mar leafst oardel punt fan Wiersma. Underyn degradearren Folkert Groenveld en de bot weromfallen Hein de Vries, de lêste omdat er úteinliks krekt wat minder wjerstânspunten hie as Willem Schaap, dy’t ek op twa wedstriidpunten útkaam.
Yn ‘e twadde acht einige Siebe Walinga neffens ferwachting boppeoan, lykwols op mar in heal punt folge troch de ferrassende Bernard Kroon. Dy is mei syn promoasje de earste Blauhúster dy’t ta it walhalla fan it Frysk damjen trochkringt. De tredde acht waard wûn troch Willem Hoekstra. Hy wurdt yn syn wei omheech beselskippe fan Siebren Dyk, en dat wylst de Jorwerter syn earste twa partijen noch ferlern hie.
Utslaggen en einstannen (mei wjerstânspunten tusken heakjes)
Kampioensklasse, sechsde omloop: Hein de Vries (Ljouwert) – Jelle Wiersma (Wommels) 0-1, Marten Walinga (Waaksens) – Taeke Kooistra (Hartwert) 0-1, Pieter Hoogterp (De Gastmar) – Willem Schaap (Jirnsum) 0-1, Folkert Groenveld (Jutryp) – Henk Haanstra (Aldegea SWF) 0-1; sande omloop: Wiersma – Walinga 1-0, Kooistra – De Vries 1-0, Haanstra – Hoogterp 1-0, Schaap – Groenveld 0-1.
Einstân: 1. Wiersma 6; 2. Kooistra 4,5 (26,5); 3. Haanstra 4,5 (26); 4. Walinga 4; 5. Hoogterp 3,5; 6. Schaap 2 (13,5); 7. De Vries 2 (9); 8. Groenveld 1,5.
Twadde acht, sechsde omloop: Bernard Kroon (Blauhús) – Siebe Walinga (Aldegea SWF) 0-1, Tsjerk Wijbenga (Arum) – Liuwe Westra (Lollum) 0-1, Fedde Wiersma (Easterein) – Kees Tijssen (Reduzum) 1-0, Cor Kooistra (Nijlân) – Dicky van der Meer (Terherne) 0-1; sande omloop: Walinga – Wijbenga 0,5-0,5, Westra – Kroon 0-1, Van der Meer – Wiersma 0-1, Tijssen – Kooistra 0-1.
Einstân: 1. Walinga 5,5; 2. Kroon 5; 3. Kooistra 4 (29,5); 4. Westra 4 (21); 5. Wijbenga 3,5; 6. Wiersma 3; 7. Tijssen 2; 8. Van der Meer 1.
Tredde acht, sechsde omloop: Willem Hoekstra (Aldegea SWF) – Bauke Dijkstra (Nijbeets) 1-0, Marcel Altena (Blauhús) – Siebren Dyk (Jorwert) 0-1, Hidde de Vries (Langsweagen) – Sjouke Attema (De Gastmar) 1-0, Rein Jan Walinga (Aldegea SWF) – Klaas Wiersma (Nijbeets) 1-0; sande omloop: Dijkstra – Altena 0,5-0,5, Dyk – Hoekstra 0,5-0,5, Wiersma – De Vries 0-1, Attema – Walinga 0,5-0,5.
Einstân: 1. Hoekstra 5,5; 2. Dyk 4,5 (30,5); 3. Dijkstra 4,5 (25); 4. De Vries 4; 5. Walinga 3,5; 6. Attema 2 (14,5); 7. Altena 2 (13,5); Wiersma 0-1.
