Auteur archief friesdammen

doorfriesdammen

Utnoeging foar kampioenskip Frysk Damjen foar froulju

Utnoeging foar kampioenskip Frysk Damjen foar froulju
Op sneon 15 febrewaris wurde de 6e en 7e rûnte fan it Persoanlik Kampioenskip spile yn doarpshûs ‘It Swettehûs’ yn Skearnegoutum.
Op dizze dei sil ek striden wurde om it kampioenskip Frysk Damjen foar froulju. Yn april 2018 gie de finale tusken Tineke Teigeler (kampioen yn 2017) en Akke Renske Walinga út Parregea. Dizze finale waard wûn troch Akke Renske. Spitigernôch koe it kampioenskip yn 2019 net trochgean, om ’t der te min dielnimster wiene. Wa wurdt de opfolchster fan Akke Renske?

Alle froulju kinne meidwaan; men hoecht gjin lid te wêzen fan in damklup as it dambûn. Elts is wolkom: froulju dy’t by in klup damme, mar ek froulju, dochters, memmen, (skoan-)susters, buorfroulju, freondinnen, kunde ensfh. fan dammers en damsters binne fan herte wolkom!

Wy rekkenje op in soad dielnimmers. It begjint de middeis 13:00 oere. It spylskema en de tinktiid is ôfhinklik fan it oantal dielnimsters.
Meidwaan kostet neat.
De prizen besteane út bekers én kadobonnen!
It soe moai wêze as der 6 oant 8 froulju/famkes komme!

Opjaan foar tongersdei 13 febrewaris om 21.00 oere by Fedde Wiersma, 06 – 21 37 87 00 as wiersmafedde@gmail.com

Ut namme fan it Dambûn Frysk Spul,
Fedde Wiersma
(skriuwer)


doorfriesdammen

De Strikers binne it geloksealige gefoel fan it kampioen wêzen noch net kwyt.

As it mei grutte letters op de foarsiden fan de Snitser en Boalserter stiet, dan bliuwt men troch de omstanners fan bûten de klup mei troch harren lokwinsken yn de sfear fan it kampioen wêzen hingjen.  Dat is fansels net in ûnaardich gefoel, nee sterker noch, dat is hearlik!Lykwols gong it moandeitejûn fierders wer werom nei de oarder fan de dei en foar guon waard it hearlike gefoel foar in lyts skoftke rûch fersteurd.

Twa fan de Strikers moasten spylje foar de Fryslân Kup. Dicky van der Meer yn Hartwert tsjin Taeke Kooistra en Cor Kooistra thús tsjin Marten Walinga. Beide Strikers koenen it net risse. Spitich, mar der binne altiten bazen boppe bazen. Dochs wienen der dizze jûn ek wer dammers dy’t baas wienen yn harren partij. Sa pakte Jan Castelein no Hennie de Haan wol, wylst dizze nijkeap it yn de twa eardere partijen tsjin har noch ôflizze moast. As er noch wat mear doel kriget oer de iepeningen, dan wurdt Jan noch in baas spiler. Oer Hennie wie er op it begjin nei eins de hiele partij de baas.

Dat Jelle Wiersma meastal de baas is yn syn partijen, wit elk. Dat wie er moandeitejûn ek. Dochs krige er de winst frij maklik troch in fersin fan Ype Boelens. Sjoerd Jan Bakker wûn de earste partij tsjin Bauke Dykstra mei in fernimstich moai slachje. Dat slachje waard ek noch even op de buorden brocht. De twadde partij tsjin deselde Bauke waard net útmakke mei in moai slachje, mar bakker Sjoerd Jan wie echt de baas oer it spul. Hy wûn mei gloarje. 

Fansels is it sa njonkenlytsen wol dúdlik dat de Strikers ek in hiele goeien hawwe oan Sjoerd Huitema. Faak hat er wat tiidneed en dat kostet him dan faak de kraach, mar it spultsje hat er goed yn de smizen. Hy siet tsjin Tineke Teigeler. No moatte jo dy Tineke nea útpoetse, want dy kin ek hiel sterk út de hoeke komme. Net altiten, it moat wat mei rinne. Tsjin Sjoerd bleau it lang lyk, mar by eitsjebesút wie Sjoerd baas. Dat Willem Schaap it winne soe fan Bauke Bos wie er eins oan syn stân wol ferplichte. Mar ja it kin soms raar rinne. Sa wûn Bauke foar de FK it in pear jier lyn noch fan de ek no oanwêzige Marten Walinga. Oer dy oerwinning fan Bauke waard fansels noch wol efkes praten. Dat wie histoarje! Tsjin Willem Schaap wie it oare koek. Dy liet him net yn de lueren lizze en wûn as in baas dammer.

Utslaggen: Sjoerd Jan Bakker – Bauke Dykstra 1 – 0; Jelle Wiersma – Ype Boelens 1 – 0; Sjoerd Huitema – Tineke Teigeler 1 – 0; Hennie de Haan – Jan Castelein 0 – 1; Bauke Bos – Willem Schaap 0 – 1; FK Cor Kooistra – Marten Walinga 0 – 1.

(Tekst: C. Kooistra)

doorfriesdammen

Rubryk 17-1-2020

Bûnsfoarsitter Liuwe Westra (wyt) en Dicky van der Meer spilen op 16 desimber yn de tredde omloop fan de ‘tredde acht’ yn Aldegea-SWF. It omsittend laach seach in moaie partij mei wikseljende kânsen en ferskate drege ferwikkelingen. 1. 31-26 20-25 2. 37-31 14-20 3. 32-27 17×37 4. 41×32 11-17 5. 46-41 5. …18-22 is in prachtset. De âlde master Jurjen Tolsma hat it hast hûndert jier lyn hielendal útsocht. Der sitte dan in protte drigingen yn. Daalk al troch 6-11 en 22-27. Wyt kin it bêste 6.33-28 22×33 7.43×14 10×19 8.49-43   5. …7-11 6. 41-37 19-24 7. 34×14 10×19  8. 33-28 8. …17-21 9.26×17 12×41 10.37×46 25-30 11.35×24 20×27 12.32×21 16×27 en wyt moat alle war dwaan om wer lyk te kommen.  8. …4-10 9. 28-22 17×28 10. 32×14 10×19 11. 31-27 19-24 12. 39-34 24-30 13. 35×24 25×23 14. 37-31 20-25 15. 38-32 Better is 15. …12-17 16.27×7 1×12. No komt wyt foar, al is it in drege stân. 15. …1-7 16. 34-30 25×34 17. 44×22  9-14 18. 40-35 14-19

Wyt kin winne troch  19.22-17! 12×41 20.26-21! 11×33 (ferpl.)  21.43×1 41×43 22.1×40 as 20,. …11×22 21.32×1 19. 42-37 3-9 19-24 is better. 20. 43-39? 20.50-44 hie moatten. Swart kin winne troch 20. …19-23! 21.22×24 18-22 22.27×18 13×42 23.47×38 16-21 24.26×17 12×14  9-14 21. 39-34 14-20 22. 34-30 20×40 23. 35×44 19-24 24. 44-40 15-20 Swart hie no in pear kear better 18-23 strike kind. 25. 40-35 20-25 26. 35×15 5×25 27. 49-44 24-29  Swart driget mei 29-33 as 29-34.  Mei 28.22-17! etc. hâldt wyt it bettere spul. 28. 27-21!? 16×38 29. 37×17 12×41  30.22-18! 8×28 (ferpl.) 31.36-31 41×21 32.26×17 11×22 33.44-40 kin ek.  30. 48-42 41×43 31. 44×42 11-16 32. 45-40 13-18? 32. …13-19 hie moatten. 33. 22×13 8×19 34. 40-34 7-11  35. 50-44 19-23

Op ‘e nij wurdt de winst net sjoen. Nei 36.26-21 11×31 37.36×27 komt wyt likegoed in hout foar. 36. 34-30 25×34 37. 44×22 2-7 38. 42-38 16-21 39. 26×17 7×18 40. 38-33 11-17 41. 36-31 17-21 42. 31×11 6×17 43. 47-42 18-22 44. 33-29 17-21 45. 29-24 22-28 46. 24-20 28-33 47. 20-14 33-39 48. 14-10 39-44 49. 10-5  En hjir waard kamp jûn.

De priiswinners fan de krystpuzzels binne 1.A.Zijlstra, Utrecht; 2.G.Ykema, De Gaastmar; 3. A.Pruijs, Emmeloord;

De problemen foar de ledder, út de rike neilittenskip fan Hiele Walinga (13 en 14) en Willem F.Bakker (15 en 16).

Nû. 13 sw. 3, 5, 8, 12, 16, 17, 40 wyt 14, 24, 31, 41, 42, 47, 49

Nû.14 sw. 5, 7-9, 18-20, 36 wyt 16, 29, 33, 39, 41, 43-45

Nû. 15 sw. 2, 4, 6, 7, 9, 24, 30 wyt 15, 17, 21, 27, 39, 44, 47

Nû. 16 sw. 5, 9, 13, 18, 20, 21, 27 wyt  29, 33, 38-41, 45

Oplossings stjoere foar 31 jannewaris

Folkert Groenveld

Riperwei 6

8623 XH  Jutryp

groenveldf@hotmail.com

doorfriesdammen

Persoanlike kampioenskippen 3e acht – 4e rûnte

Kommende freed 17 jannewaris wurde yn kluphûs SieSa te Blauhûs wer fjouwer partijen yn de fjirde rûnte fan it persoanlike kampioenskip yn de tredde acht spile. De partijen begjinne om 19:30 oere.

Bernard Kroon – Liuwe Westra

Marcel Altena – Fedde Wiersma

Ype Boelens – Siebren Dyk
Piet Sikma – Dicky van der Meer

De partijen binne live te folgjen fia https://toernooibase.kndb.nl/ en klik op livegames (sjoch ûndersteand plaatsje)

Ek de partij fan Taeke Kooistra tsjin Dicky van der Meer (moandei 20 jannewaris) yn de 3e ronde fan de Fryslân Kup wierskynlik live te folgjen fia ynternet.

doorfriesdammen

It koe net , mar it wie al safier

Fansels waard der neipraat oer de grutte prestaasje fan it earste achttal fan de Stadige Strikers, ôfrûne sneon yn Easterein. Klubkampioen! wa hie dat tinke kinnen? Fansels wiene der inkelde dammers dy’t dit ferline wike foarsein hiene, mar it moat altyd earst noch mar ris, mar in bytsje selsfertrouwen is fansels net ferkeard.

De foarsitter wie sa bliid as in protter en sadwaande hie er him mei syn frou in pear dagen Texel kado jûn en moasten wy it dizze jûn sûnder him stelle. Lokkich wie Ype Boelens, dy’t sneon alhiel net fit wie, wer safier opknapt dat er jûn wer fan de partij wie, mar dan tsjin de altyd drege Willem Schaap damje is in toer en dit ferlear er dizze kear. Us jeugdleden, Kees Castelein en Hester Boelens mochten it tsjin mekoar opnimme en Kees foel foar de sjarmes fan Hester (of Hester makke it him te dreech op it boerd, dat wit de skriuwer net), mar Hester wûn de partij. Dicky van der Meer hie wakker praatsjes en wûn it earste spul tsjin Tineke en woe it dêrnei noch wol efkes opnimme tsjin Jan Castelein, dy’t efkes wachte hie oant der in partij út wie. Ek dizze partij koe er byskriuwe oan syn winstpunten, dus hy bleau noch efkes yn de winstfreugde.

It dreechste en langst spul waard spile troch Bauke Bos en Sjoerd Huitema. Efkes like Bos de bettere papieren te hawwen, mar de altyd drege Huitema jout net samar op en komt faaks wol wer werom as syn tsjinstanner wat meiwurket. Bos hie it kamp meitsje kinnen, mar seach dit oer de holle en sadwaande ferlear hy de partij nei in tige spannend spul. 

Utslaggen:Sjoerd Jan Bakker – Hennie de Haan 1-0Dicky van der Meer – Tineke Teigeler 0-1Hester Boelens – Kees Castelein 1-0Sjoerd Huitema – Bauke Bos 1-0Jelle Wiersma – Bauke Dijkstra 1-0Ype Boelens – Willem Schaap 0-1Jan Castelein – Dicky van der Meer 0-1

(Tekst: Bauke Bos)

doorfriesdammen

Damklup Hartwert kopke-ûnder


Sensaasje en gjin ein, sneon by it klupkampioenskip yn it damjen Frysk spul yn seal Bergsma yn Easterein. De damklup út Hartwert, de lêste trije jier kampioen, wie no ek wer de favoryt. Mar it betearde gâns oars. Net Hartwert, mar Skearnegoutum rûn mei de heechste eare fuort, oars ek mar krekt, want it skilde mar ien buordpunt mei Aldegea (SWF). It drama waard foar Hartwert ek noch folle grutter. De klup degradearre sels út de kampioensklasse, foar it earst sûnt 1986.

Nei de earste fan ‘e trije omlopen like it dêr oars noch net op. Hartwert wûn fan Skearnegoutum, ek al wie it mei it lytst mooglike ferskil. En Aldegea fersloech outsider Lollum mei grutte sifers. Nei de snert stie alles lykwols wer op ‘e kop. Aldegea ferlear no mei 6-2 fan Skearnegoutum. Hartwert moast it opnimme tsjin Lollum, dat in stikmennich bûtenleden ynset hie, lykas de sterke Hollânske dammer Hans Jansen. Se hiene sels in Belch yn ‘e ploech. De Hartwerters wiene sa’t it liket sa ymponearre fan al dy frjemde gesichten dat se mei mar leafst 6-2 it skip yn gongen.

Troch dy resultaten stiene alle fjouwer ploegen no yn wedstriidpunten gelyk. Yn ‘e tredde en lêste omloop moast de bûter dus jild jilde. Hartwert moast tsjin ‘e âlde rivaal Aldegea. Mar de Hartwerter ploech wie dizze sneon himsels net. Op ‘en nij ferlearen se mei 6-2. Skearnegoutum fersloech ûnderwilens Lollum, en kaam sa yn wedstriidpunten gelyk mei de Aldegeasters. Omdat Skearnegoutum 15 buordpunten byinoar garre hiene, en Aldegea 14, wiene it “De Stadige Strikers” dy’t de kampioenstsjelke nei Skearnegoutum bringe mochten.

Buordpunten beslisten ek oer de degradaasje. Lollum hie 10,5, mar Hartwert kaam net fierder as 8,5. Dat betsjutte net allinnich dat it de titel kwyt wie, mar, miskien noch folle slimmer, dat it ek nochris út de heechste klasse truzele. Mar ien kear earder moast Hartwert dy fernedering ûndergean, en dat is ek al wer 34 jier lyn. Al steane dêr fansels sûnt 1954 ek mar leafst 33 kampioenskippen foaroer.

Hartwert syn plak wurdt takom’ jier ynnaam troch Blauhús, dat mei trije oerwinnings glorieus de twadde klasse op syn namme skreau. De oare trije ploegen kamen net fierder as ien wedstriidpunt, sadat hjir ek wer de buordpunten beslisten oer degradaasje. Jorwert waard it slachtoffer, it mei takom’ jier besykje om werom te kommen út de tredde klasse wei. Dy klasse waard no wûn troch it twadde tiim fan Aldegea.

Utslaggen en einstannen

Kampioensklasse: Hartwert – Skearnegoutum 4,5-3,5, Aldegea – Lollum 6-2; Lollum – Hartwert 6-2, Skearnegoutum – Aldegea 6-2; Aldegea – Hartwert 6-2, Skearnegoutum – Lollum 5,5-2,5.
Einstân (mei tusken heakjes de buordpunten): 1. Skearnegoutum 2 (15); 2. Aldegea 2 (14); 3. Lollum 1 (10,5); 4. Hartwert 1 (8,5).

Twadde klasse: Blauhús – Hartwert II 6-2, Jorwert – De Gastmar 4,5-3,5; De Gastmar – Blauhús 3-5, Hartwert II – Jorwert 6-2; Jorwert – Blauhús 1-7, Hartwert II – De Gastmar 3-5.
Einstân: 1. Blauhús 3 (18); 2. De Gastmar 1 (11,5); 3. Hartwert II 1 (11); 4. Jorwert 1 (7,5).

Tredde klasse: Skearnegoutum II – Lollum II 8-0, Aldegea II – De Gastmar II 4,5-3,5; De Gastmar II – Skearnegoutum II 5-3, Lollum II – Aldegea II 1-7; Aldegea II – Skearnegoutum II 4-4, Lollum II – De Gastmar II 0,5-7,5.
Einstân: 1. Aldegea II 2,5 (15,5); 2. De Gastmar II 2 (16); 3. Skearnegoutum II 1,5 (15); Lollum II 0 (1,5).

Foto: Bouwe Jan Bouma

doorfriesdammen

Spannende striid om klupkampioenskip Frysk damjen ferwachte


Kommende sneon stride de ferienings dy’t oansletten binne by it Dambûn Frysk Spul yn seal Bergsma yn Easterein wer om it klupkampioenskip. Ferline jier gie yn ‘e kampioensklasse de heechste eare op ‘en nij nei de damklup út Hartwert. Hoewol’t de Hartwerters útsoarte wer de grutste favoryt binne, is it net sein dat se dat ek wiermeitsje kinne, want de ferskillen tusken de klups binne net grut. Hartwert hat dit jier net allinne rekken te hâlden mei Aldegea-SWF, mar moat ek ôfweve mei “De Stadige Strikers” út Skearnegoutum, dy’t Jelle Wiersma, de sterkste dammer fan allegearre, yn ‘e ploech hawwe. Lollum-Waaksens is miskien yn ‘e bridte wat minder sterk, mar de ploech bliuwt in gefaarlike outsider dy’t eltse favoryt samar stroffelje litte kin.
De striid yn ‘e twadde klasse is noch folle minder oer te sizzen. Blauhús, De Gaastmar, Jorwert en Hartwert II, se kinne elk foar oar promovearje, mar de kâns op degradaasje is like grut.

doorfriesdammen

Slagge earste damdei fan 2020 yn Hartwert.

Op de earste sneon fan it nije jier organisearret damklup Hartwert al sûnt har bestean har jierlikse wedstriid. Der wiene 18 dammers op dizze damdei ôfkommen. Nei elkoar de bêste winsken te jaan en nei de gebrûklike iepeningswurden fan de foarsitter waard elk yndield yn groepkes op wearde fan harren damkwaliteit. Der waard ferskuorrendst damd. Sa yn it begjin fan it nije jier wol guon harren noch wol ris healwiis fersjen, mar dat barde hjoed mar by inkele dammers.

De winst yn de eareklasse gie tusken Taeke Kooistra en Folkert Groenveld. Beide mannen hiene harren partijen wûn, dus moast de ûnderlinge partij de winner oanwize. It like dat Folkert dit yn syn foardiel beslisse soe, mar troch in lyts flaterke wûn Taeke dizze partij. Yn de haadklasse wie Dicky van der Meer de grutte man. Twa kear winst en ien kamp. Liuwe Westra gie mei de twadde priis nei hûs.

Germ Bruinsma sloech feninich ta yn groep 1 fan de earste klasse. Hy wûn alle trije partijen. As twadde einige Sjoerd Kooistra dy’t allinne belies jaan moast tsjin de priiswinner. Yn de oare groep fan de earste klasse pakte Frans Kingma de earste priis. De twadde priis wie foar Sjouke de Boer.

Yn de twadde klasse liet Klaas Wiersma sjen dat hy noch wol damje kin. De man út Nij Beets ropt al wiken dat der net mear damme kin. No dat wie net te sjen want hy wûn alle trije partijen. De twadde priis wie foar de jeugdige dammer Herre Klaas Ykema fan De Gaastmar. It die wol bliken dat hy talint hat want hy ferlear allinne syn partij fan de priiswinner.

Folsleine útslach: Eareklasse: 1. Taeke Kooistra, 2. Folkert Groenveld. Haadklasse: 1. Dicky van der Meer, 2. Liuwe Westra. 1e klasse groep 1: 1. Germ Bruinsma, 2. Sjoerd Kooistra. 1e klasse groep 2: 1. Frans Kingma, 2. Sjouke de Boer. 2e klasse: Klaas Wiersma, 2. Herre Klaas Ykema

doorfriesdammen

Hartwert wie De Strikers de baas yn in spannend treffen.

It âldjier kin damklup De Stadige Strikers suver net moaier ôfslute as yn in treffen tsjin damklup Hartwert e.o.  Yn Hartwert fûn de tradysje fan de freonskiplike striid  tsjininoar plak. In striid wie it. Hoewol’t Hartwert nochal rap op foarsprong kaam, nei’t de earste punten foar de Strikers wienen, rûgelen der ek noch hiel wat punten nei Skearnegoutum ta. Uteinlik wie Hartwert de baas.

Beide klups setten trettjin spilers achter de buorden. Gjin inkele dammer hoegde stil te sitten. Doe’t der tolve spultsjes út wienen stie der op it skoareboerd: 6½ – 5½. De Strikers hienen noch in punt nedich om der kamp út te slepen. Herman Scheltinga siet tsjin Bauke Dykstra. Beide mannen spilen in moai iepen spul. Alle Strikers hopen fansels dat Dykstra winne soe. Dan soenen de klups op itselde oantal punten komme. Yn de einstriid krige Herman de bettere papieren en wûn.

De foarsitter joech likegoed heech op fan syn ferliezende ploech. Hy murk op dat syn spilers alles der oan dien hienen om te winnen. De measte partijen brûkten hast de hiele beskikbere tiid. Ek de twa debutanten fan de Strikers, heit en soan, Jan en Kees Castelein. Sy ferlearen beide wol, mar wol nei in protte striid. Sy moasten it opnimme tsjin twa yn it sâlt bebiten dammers: Jesse Boschma en Ids Boersma. It wie gjin wûnder dat dy beide Hartwerters it wûnen. 

Al mei al siet men rêstich en konsintrearrre te damjen yn it tige noflike ûnderkommen: It Terphûs. De Strikers ha de Hartwerters al fêst wer útnûge foar de striid takom jier yn Skearnegoutum.

Utslach: Hein de Vries – Jelle Wiersma 0 – 1; Taeke Kooistra – Sjoerd Jan Bakker 1 – 0; Tsjerk Wijbenga – Dicky van der Meer 1 – 0; Fedde Wiersma – Willem Schaap 0 – 1; Herman Terwisscha van Scheltinga – Bauke Dykstra 1 – 0; Germ Bruinsma – Cor Kooistra 0 – 1; Sjoerd Teake Kooistra – Ype Boelens ½ – ½; Jan Bouma – Sjoerd Huitema 0 – 1; Klaas Abma – Bauke Bos 1 – 0; Klaas Wiersma – Tineke Teigeler 0 – 1; Siebe Elzinga – Hennie de Haan 1 – 0; Jesse Boschma – Jan Castelein 1 – 0; Ids Boersma – Kees Castelein 1 – 0. Einstân 7½ – 5½.

Tekst: Cor Kooistra

doorfriesdammen

Loting 3e ronde Fryslânkup

Hjir de lotting fan de tredde ronde.

Teake Kooistra             –           Dicky van der Meer.

Sybren Dyk                  –           Herman terw/van Scheltinga.

Siebe Walinga             –           Folkert Groenveld.

Cor Kooistra                –           Marten Walinga.

De toto kin ynlevere wurde oant moandei 6 januari.

De lotting foar de heale finale is op freed 24 januari yn Blauhus.

Jappie De Jong.